BAGUIO CITY – Pappapartaken ti ama ti Baguio City ti proseso para iti panakaipaay ti permit iti plano nga environmentally-friendly a waste-to-energy project a maibangon iti pribado a lote sadiay Sablan, Benguet.
Sigun kenni Mayor Benjamin Magalong, inimbitaranna da Energy Secretary Alfonso Cusi ken Environment Secretary Roy Cimatu tapnu agturongda ditoy siudad para iti panakailawlawag ti proyekto kadagitoy.
Kinunana a babaen iti daytoy ket mapapartak met ti panakaipaay ti kasapulan a permit ti proponent a Metro Global Renewables Corporation.
Inlawlawagna manen a babaen iti nasao a proyekto ket permanente a masolusyonan ti parikut iti panakaimaton dagiti basura iti Baguio-La Trinidad-Itogon-​Sablan-Tuba-Tublay (BLISTT) ken mapataud pay ti kanayonan a kuryente para iti Luzon.
Innayonna a no matungpal ti plano ket makaaramidda iti pakasaritaan gaputa mabigbig ti BLISTT kas kaunaan nga LGUs iti pagilian a naaddaan ti bukod a waste-to-energy facility nga state of the art technology.
Imbinglayna a nakitaripnong dagiti opisyales ti Baguio kadagiti miembro ti Benguet Provincial Board, Sablan Municipal Council, ti proponent a korporasyon ken dadduma a maseknan nga ahensia ti gobyero, no sadino, nagsaritaanda dagiti isyu ken pakaseknan iti proyekto ken no kasano a marisut dagitoy.
Sigun pay kenni Mayor Magalong, pabor ti kaaduan kadagiti konsehal ti Sablan iti panakaibangon ti proyekto sadiay ken tumultulong ti agtagikua iti pribado a lote iti panakarisut dagiti pakaseknan dagiti tattao, partikular ti relokasyon dagiti babbalay a maapektaran iti proyekto.
Kinunana a batang ti Baguio LGU ti 400 a tonelada ti basura para iti waste-to-energy plant bayat a batang ti LISTT area ti 100 a tonelada ti basura tapnu makompleto ti 500 a tonelada ti basura a kasapulan a minimum supply tapnu mapataud ti planta ti 10 megawatts a kuryente.
Dinakamat met ti proponent a mabalin a mailako ti nasao a kuryente iti Benguet Electric Cooperative.
Imbinglay pay ni Mayor Magalong nga ipoproseso ita ti proponent ti maikalkalikagum nga Environmental Compliance Certificate (ECC) tapnu marugianen ti proyekto inton sumaruno a tawen.
Iti agdama, agpada a maiturturong iti sanitary landfill sadiay Capas, Tarlac dagiti residual wastes ti Baguio City ken sumagmamano nga LGUs iti Benguet.
