BAGUIO CITY – Saan paylaeng a posible ti panakaiddep ti traffic lights iti maysa a kalsada gapu ta nakakonek daytoy kadagiti nagduduma a traffic lights iti central business district ti Baguio City.
Kasaruno daytoy ti nagviral a video a panagsita ti maysa nga enforcer iti rider a nagballasiw iti kalsada bayat a naka-green light ti traffic light iti kalsada a paset ti Magsaysay Avenue.
Iti exclusive interview ni Bombo Jez Lapizar kenni PLtCol. Zacharias Dausen, mangidadaulo ti Traffic Enforcement Unit, inlawlawagna kas maibasar iti pagannurotan ti Land Transportation Office a nu adda ti traffic enforcer iti kalsada nga agmanmando iti trapiko ket kasapulan a dagitoy ti masurot ken saan a ti traffic light.
Nupay kasta, nakaawat ladta daytoy ti nagduduma a pammabalaw nu sadino sumagmamano kadagitoy ket ti panakaiddep dagiti traffic lights nu adda ti enforcer tapno saan a malito dagiti motorista.
Nagpalagip pay ni PLtCol. Dausen a kasapulan nga agbalin nga alerto dagiti motorista nangruna nu dumaldalyasatda kadagiti intersection iti siudad.
Kabayatanna, kidkiddawenna ti kooperasyon dagiti motorista kadagiti enforcers nga agmanmando iti trapiko para iti naannayas a gunay ti trapiko ken malapdan ti aniaman a pasamak iti kalkalsada ti siudad.
