BAGUIO CITY – Inlawlawag manen ti maysa a Branch Manager ti National Food Authority (NFA) ti akem ti ahensia iti distribusyon dagiti NFA rice.
Iti interview ti Bombo Radyo Baguio, imbinsa ni Frederick Dulay, Branch Manager ti NFA La Union nga agtultuloy ti mandatoda a mangipatalged ti supply ti NFA a maibunong kabayatan dagiti kalamidad ken emerhensia.
Kinunana a nailanad daytoy iti Rice Tariffication Law isut gapu a karaman kadagiti addang nga ar-aramidenda ti panaggatang ti irik kadagiti mannalon
Innayunna a naibilin pay iti nasao a linteg a maiparparit iti panag-angkat ti ahensia iti bagas.
Kinunana a gatgatangenda iti P19 ti tunggal kilo ti irik kadagiti mannalon sakbayda nga ipagiling tapnu nakasagana a maipaay nu kasapulan dagiti umili.
Inyuna-unayna a ti nasao a linteg ti rason nu apay a naikkat ti panaglako ti NFA rice kadagiti merkado publiko.
