BAGUIO CITY – Kidkiddawen ti ama ti Baguio ti panangilukat ti Bases Conversion Development Authority-John Hay Management Corporation (BCDA-JHMC) kadagiti leisure spots sadiay Camp John Hay tunggal aldaw ti Dominggo para kadagiti senior citizens ken ubbing.
Sigun kenni Mayor Benjamin Magalong, silulukat met dagiti opisyales ti BCDA-JHMC iti nasao a kiddaw ken addan ti binukelda nga inisyal a plano, partikular ti panakasurot dagiti security measures ken ti health ken safety protocols kontra iti COVID-19.
Partikular a disso a kidkiddawenna a mailukat kadagiti natataengan ken kadagiti ubbing ket ti ayala ground, likod ti maysa kadagiti kadakkelan a hotel, ti Yellow Trail ken ti eco-trail malaksid pay iti children’s park iti Scout Hill.
Naamuan nga agtaripnong ti lokal a gobyerno ti Baguio ken dagiti opisyales ti JHMC inton June 29 para iti panaka-aprobar ti mabukel a pagalagadan para iti nasao a plano.
Maipalagip nga iti laeng aldaw ti Dominggo a maipalubos ti iruruar dagiti natataengan ken dagiti ubbing iti agdama a community quarantine gapu iti COVID-19 pandemic.
