Agtaltalinaed a nasayaat ti panakaipaay ti serbisyo kadigiti komyuters iti agadama partikular dagiti agluglugan iti jeep.
Iti panakiuman ti Bombo Radyo kenni Wilson Bumay-et, Presidente ti Jeepney Federation Baguio-Benguet, naobserbaranda a saan nga agkurkurang dagiti jeep nga agpasada iti nagduduma a ruta iti siudad ti Baguio kagiddan ti panagrugi ti klase dagiti estudyante.
Nupay kasta, adda ti nakitada a parikut iti trapiko partikular iti daduma a paset ti La Trinidad gapu iti manarimaan a konstruksyon iti kalsada.
Sigun kenni Bumay-et, makaitunda latta ti panakaurnong ken panakataktak ti biyahe dagiti pasaheros nu aggiddan ti traffic kadagiti kalsada ngem mabaelanda latta met a makadanon kadagiti destinasyonda iti uneg ti trenta minutos agingga maysa nga oras.
Kabayatanna, imbinglay ni Bumay-et a bayat ti panagmonitorda kadagiti terminal dagiti jeep nga addan ti naipaayanda ti warning.
Kagiddan dayta, ipagpaganetget daytoy kadagiti opisyales ti babbarangay iti Central Business District a pagtalinaidenda ti koordinasyonda kadagiti transport groups nga addaan iti staging area wenno terminal kadagiti masakupanda tapno makipartisipar dagitoy iti regular a panakaipatungpal ti clean-up drive.//Bombo Rob Dominguez
