BAGUIO CITY – Ad-adalen ita ti Baguio City Veterinary and Agriculture Office ti panakaipalubos manen ti panagtaraken ti baboy ditoy Baguio.
Sigun kenni Dr. Bridgit Piok, dadaulo ti nasao nga opisina, mairekrekomendar ti panakaisubli ti panagtaraken ti baboy kadagiti outskirts wenno igid a paset ti siudad.
Kinunana a daytoy ket gapu iti parikot iti agkurkurang a suplay ti karne iti lokalidad a mangituntunda iti nangina a presyo daytoy.
Impettengna a napintas ti nasao a plano la ketdi agtungpal dagiti hog raisers kadagiti pagalagadan seknan iti panakasalwad ti aglawlaw ken makaawatda ti pammalubos manipod kadagiti maskenan nga ahensya ken opisina ti gobyerno.
Inyunay-unayna pay a nasken a maipasigurado a saan a kadagiti residential areas ti pakaipatungpalan ti panagtaraken ti baboy.
Kabayatanna, impanamnama met ni Department of Agriculture – Cordillera Regional Technical Director for Operations Engr. Danilo Daguio nga adda ti teknolohiya a mabalin a maadaptar tapnu saan a madadael ti aglawlaw iti kanito a maisubli ti panagtaraken ti baboy ditoy Baguio City.
