BAGUIO CITY- Plano ti Department of Education (DEPED)– Cordillera a mairaman iti face to face classes dagiti amin nga estudyante ti elementarya ken secondarya iti school year 2022-2023.
Nupay kasta, inlawlawag ni DepEd-CAR Regional Director Estella Cariño a saan nga inaldaw ti iseserrek dagiti estudyante iti pagadalan.
Dinakamatna nga adda laeng ti sumagmamano nga aldaw nga ituding dagiti pagadalan a sumrekan dagiti estudyante iti maysa a lawas.
Innayonna a dagiti daduma nga aldaw a saanda a sumrekan iti pagadalan ket maipaay kas home activities.
Impetteng ni Cariño a saan paylaeng a mabalin a maipatungpal ti full-in person classes iti rehiyon gapu iti kinakurang ti resources kas ti classroom, mannursuro ken daduma pay.
Gapu iti daytoy, impaganetgetna a kasapulan latta dagiti daduma a learning modalities kas ti blending learning ken modular.
Iti kaudian a datus, 863 a parapubliko a pagadalan iti Cordillerra ti mangipatpatungpal iti limited face-to-face classes.
Manipud iti nasao a bilang, 678 ditoy ket elementarya,162 ti sekondarya ken 23 ti integrated.
