BAGUIO CITY – Impalagip manen ni Executive Secretary to the Mayor Benjamin Macadangdang ti panangipangruna dagiti otoridad iti pakaseknan iti salun-at nangruna ita naipasidong iti hard lockdown ti dua a lugar ditoy siudad ti Baguio.
Iti panakiyuman ti Bombo Radyo iti opisyal, kinunana a kasapulan a mapairteng pay ti serbisyo ti Barangay Health Emergency Response Team (BHERT) ken ti aktibo a partisipasyon ti publiko kadagiti pagalagadan nga ipatpatungpal ti gobierno.
Inaklona a kadawyan a maaw-awatda a parikut ti saan nga epektibo a panakaiyemplemntar dagiti paglintegan kabayatan iti lockdown dagiti babbarangay no sadino inlawlawagna nga adda dagiti partikular a guidelines a nasekn a masurot iti regular lockdown kasta met ti localized ken hard lockdown.
Imbinglay pay ni Macadangdang a kangrunaan a malablabsing ti ordinansa ti siudad seknan iti regulasyon ti panangilako ken panaginom iti arak nangruna kadagiti pasken a limed nga ipatpatungpal dagiti residente.
Gapu iti daytoy, kiniddawna kadagiti konseho ti babbarangay ti nainget a panagbantay ken panagregulate-da kadagiti establishimiento nga agilaklako iti arak kasta met dagiti pagtaengan a pakaipatpatungpalan dagiti pasken.
Maminsan manen nga inyapela ti opisyal iti panagturay ti disiplina ti publiko kadagiti paglintegan ti COVID-19 nangruna ita ta agtultuloy ti panagngato ti kaso ti nasao a virus ditoy lokalidad.
