BAGUIO CITY- Mangnamnama dagiti nadumaduma nga assosasyon ti pocket miners a maisubli ti normal nga operasyon dagiti small scale mining iti probinsya ti Benguet.
Sigun kadagiti minero, dakel ti epekto ti stoppage order nga inyulog ni sigud a Department of Environment and Natural Resources Secretary Roy Cimatu iti panagbiyagda a nakadependar laeng iti nadakamat a panggedan.
Maipalagip a ti stoppage order ket naiyulog kalpasan iti land slide sadiay level 070 Ucab, Itogon a nagresulta ti panakagabor ken ipupusay ti ginasgasut a minero kagidan iti panagdalapos ni typhoon Ompong di tawen 2018.
Malakasid iti dayta, impeksa pay dagiti minero a mariknada paylaeng agingga iti agdama ti epekto ti pandemya
Kagidan iti daytoy nagyaman dagiti pocket miners kenni Congressman-elect Eric Go Yap gapu iti initsyatibo na a mangipaay remedyo tapnu masolusyunan ti parikotda.
Maipalagip nga inwaragawag ni Yap a ti kiddaw dagiti minero a mawaswas ti temporaryo nga stoppage order ti small scale mining operations sadiay Benguet ket idanonna kadagiti maseknan nga opisyales ti nasional a gobyerno iti kanito a pormal a nagtugawen daytoy a regular representative wenu Congressman ti probinsya.
