BAGUIO CITY – Agtatalinaed a normal ti transaksion dagiti nateng kadagiti trading centers a masarakan sadiay La Trinidad, Benguet iti baet dagiti precautionary measures kontra iti pangta ti COVID-19.
Iti interview ti Bombo Radyo Baguio kenni Agot Balanoy, panakabagi ti liga dagiti asosasyon dagiti stakeholders iti La Trinidad Vegetable Trading Post, pinaglibakanna dagiti agwarwaras a damag a saanen a mabalin a maiturong sadiay Metro Manila dagiti nateng manipud ditoy highlands.
Kinunana nga iti panagdamagna kadagiti maseknan nga ahensia kas iti Department of Agriculture (DA) ket naamuanna nga awan ti pammilin para iti panakaipawil ti panakaiturong sadiay Metro Manila dagiti nateng nga agtataud ditoy.
Inlawlawag ti DA a saan nga apektado dagiti nateng iti panag-istrikto kadagiti sumrek iti Metro Manila gaputa makan dagitoy.
Dinakamatna a normal latta ti transaksion iti nateng kadagiti trading centers iti La Trinidad, Benguet, pakairamanan ti iseserrek dagiti nateng iti masakupan ti Metro Manila.
Innayonna nga innaldaw a nakalukat dagiti trading centers sadiay La Trinidad gaputa adu met dagiti sumang-at a buyers ken adu dagiti nateng a mailako.
Kabayatanna, dinakamat ni Balanoy a normal paylaeng ti kaadu dagiti nateng a maiturturong sadiay La Trinidad Vegetable Trading Post ken adda ti ngimmatuanna bassit ti presyo ti sumagmamano kadagiti nateng idi kalman ken idi agsapa.
Sigun kenkuana, adu dagiti buyers a nag-volume purchase idi kalman ken idi agsapa gapu iti buteng dagitoy a maipawil ti panakaiserrek dagiti nateng sadiay Metro Manila a nagresulta iti nangatngato bassit a presyo dagiti nateng no idilig kadagiti napalpalabas a lawas ken bulan.
