BAGUIO CITY – Manamnama a mapagtalantanan iti City Planning Office ti pannakapalawa ti dalan tapno makaaramid ti sidewalks ken panakapabaro ti pintora dagiti pedestrian lane iti nagduduma a lugar iti siudad ti Baguio nangruna kadagiti asideg ti pagadalan.
Kasaruno daytoy ti maaw-awat ti Bombo Radyo Baguio nga arungaing nga awan ti sidewalks dagiti sumagmamano a dalan gapu iti nailet a kalsada ken awanan ti pintor dagiti pedestrian lane a kangrunaan a pagdaldalyasatan dagiti studyante paturong kadagiti pagadalan dagitoy.
Iti interview ti Bombo Radyo kenni Benjamin Macadangdang, Assistant Executive Secretary ti Barangay Affairs Office, impasiguradona a pagsaritaanda ti nasao a banag gapu ta paset daytoy ti programa ti lokal a gobyerno ti siudad.
Nupay kasta, kidkiddawen ni Macadangdang kadagiti barangay officials nga adalenda a nalaing dagiti parikut iti masakupanda a maipangpangruna karaman ti pakaseknan ti sidewalks sakbayda nga agaramid ti request iti City Engineering Office.
Kinunana pay nga aramiden kuma dagiti opisyales ti pagrebbenganda kas maysa a “public servant” saan a kas panagpolitika iti maysa a programa.
Kabayatanna, dinakamat ti nasao nga opisyal a manarimaan ti panagpintor ti dalan dagiti sumagmamano nga indibidual tapno agserbi daytoy kas sidewalks.
Inlawlawag met ni Macadangdang a mabalin nga usaren dagiti opisyales ti 20% a pondo ti barangay kas Barangay Development Program.
Malaksid iti dayta, kidkiddawenna iti publiko nga iyasidegda dagiti arungaingda iti maipatpatungpal a barangay assembly gapu ta oportunidad dagitoy a mairuar ti pakaseknanda ken tapno marisut daytoy iti kabiitan a panawen.//Bombo Benjo Guzman
