Naipadanunen iti Department of Works and Highways(DPWH) ti pakaseknan dagiti motorista iti munisipalidad ti Atok a panakapukaw dagiti cats eye kadagiti kalsada.
Iti paset ti panakiuman ti Bombo Radyo kenni Atok Mayor Franklin Smith, kinunana a saan a rumbeng a takawen dagiti cats eye iti kalsada gapu ta dakkel daytoy a katulungan kadagiti motorista nangruna kadagiti agbibiahe ti rabii.
Malaksid iti dayta, dinakamat ni Mayor Smith a narisgu ti kalsada nangruna iti paset ti Halsema a masakupan daytoy.
Nupay dumanunen iti singkwenta porciento ti paset ti nasao a dalan ti addaan ti cats eye, kinuna ti mayor nga agtultuloy ladta ti panag-apelada iti Department of Public Works and Highways(DPWH) iti panakanayun daytoy.
Kabayatanna, dumanun metten iti trenta porciento ti paset ti dalan a masakupan ti Atok ti naaddaanen ti streetlights.//Rob Dominguez
