BAGUIO CITY – Naartapan ti Philippine Drug Enforcement Agency (PDEA)-Cordillera ti expectation wenno namnamaen ti publiko a maaramidan dagitoy.
Iti panakiuman ti Bombo Radyo Baguio, impannakkel ni PDEA-Cordillera regional director Gil Castro nga inaramidda amin ti kabaelanda iti mandatoda ken makita iti rekord dagitoy a naartapanda ti puntiryada idi napalabas a tawen nangruna iti supply and demand reduction ken iti rehabilitation ang reintegration program.
Kinunana nga idi napalabas a tawen ket pakabuklan a P1.6-B a gatad dagiti iligal a droga ti nakumpiskar dagitoy kadagiti nasurok 500 nga anti-illegal drugs operations a nakatiliwan ti 536 a drug personalities nga addaan operasyon iti rehion ken panakaipila ti agarup 600 a kaso iti korte kontra kadagiti nasao nga indibidual.
Innayonna a nabaelanda met a naisurwan ken napaka-ammuan iti dakes nga epekto ti iligal a droga ti agarup 50,000 nga indibidual iti rehion.
Naduktalanda met iti initial assessment ti rehabilitation ang reintegration program ti PDEA-Cordillera nga adu nga indibidual iti rehion ti nagpasidong ti rehabilitasyon.
Sigun kenkuana, irtengan ti ahensia ti panangipaayda ti tulong kadagiti kayatda ti maipasidong ti rehabilitasyon ken maisubli iti komunidad kas maysa a produktibo nga umili.
Inkari pay ni Director Castro a saan a maapektaran ti panagtrabaho ti PDEA iti panagbaliw ti administrasyon gaputa dagiti ar-aramidenda ket isu ti ponponduan ti gobyerno.
