Idagdagadag ni Department of Health Secretary Teodoro Herbosa ti awagda a mangiparit kadagiti produkto ti vape ken maingato iti buis kadagiti produkto ti tabako.
Daytoy ket kinunana bayat ti panagrambak iti World “No Tobacco Day” ken “National No Smoking Month” ita nga aldaw.
Bayat ti nasao a programa a naangay iti Philippine Heart Center, impalagip ni Herbosa iti publiko ti peggad iti salun-at ti panagsigarilio, kas iti atherosclerosis, a mabalin nga agtungpal iti atake ti puso wenno stroke.
Kagiddan iti daytoy, imbinglay ni Herbosa nga isuna ket maysa a managsigarilio ngem nagbaliw ti pananunotna kalpasan a nakitana iti amana ti epekto ti panagsigarilio.
Kinuna pay ni Herbosa nga ituloyna nga idagadag ti panangiparit ti panagaramat ti vape, a kapada idiay Singapore ken Vietnam.
