Maipalpalagip kadagiti nagkandidato iti kalleppas nga eleksyon, nangabak man wenno saan nga isumitirda dagiti Statement of Contributions and Expenditures(Soce) dagitoy agingga inton June 11, 2025.
Iti panakiuman iti Bombo Radyo kenni Atty. Elenita Tabangin-Capuyan, ti regional head iti Task Force Early Voting-Cordillera, kinunana a ti panangisumitir iti SOCE ket mandatory kadagiti amin a nagkandidato.
Sigun kenni Atty.Capuyan,kadawyan a saanda nga ilaylayon ti naituding a deadline iti panangisumitir iti SOCE tallo pulo nga aldaw kalpasan iti eleksyon.
Innayon ti opisyal nga umdasen jay makabulan a pawayway kadagiti nagkandidato tapno ileppasda ti nasao a dokumento.
Mailanad iti Statement of Contributions and Expenses dagiti amin a nagastos dagiti nagkandidato sipud nangrugi ti panagkampanya dagitoy pakairamanan metlaeng dagiti in-kind contributions ken nu nagtaudan dagitoy.
Ti panakakiddaw iti SOCE ket tapno masigurado nga umno laeng a gatad ti inaramat dagiti kandidato para iti panagkampanya dagitoy maitunos iti posisyon a tinarayanda ken kadakkel ti masakupanda.
Mainaig iti dayta, kinuna ni Atty. Capuyan a masapol a naannad ti panakaibinsa-binsa dagiti gastos gapu ta ti panagsobra iti gatad a rumwar ket maysa a panaglabsing iti paglintegan.
Malaksid iti dayta, mabalin a sumango iti kaskenan a pannusa dagiti kandidato a saan a mangisumitir kadagiti SOCE-da kas iti perpetual a panakaiparit ti panagngayangay daytoy kadagiti sumarsaruno pay nga eleksyon.
Iti probinsya iti Benguet, kinuna ni Atty. Capuyan a ti panaglabsaing a kadawyan a mapaspasamak ket ti naladaw a panakaisumitir dagiti SOCE, ti saan a panagisumitir dagiti naabak a kandidato,bayat a dagiti daduma ket talaga a saanen mangisumsumitir iti nasao a dokumento gapu ta awanen dagitoy ti panggep nga agngayangay.//Bombo Rob Dominguez
