BAGUIO CITY – Immapela ni Benguet Caretaker Congressman Eric Go Yap kenni Baguio City Mayor Benjamin Magalong tapno maikonsidera ti naipaulog a travel restriction kadagiti borders ti syudad ken munisipyo ti La Trinidad, Sablan, Tuba ken Tublay, Benguet wenno LISTT area.
Sigun ken Yap, sidadaan a nangipalubos dagiti lokal a gobierno ti Benguet a magna dagiti turista nga agturong iti siudad ti Baguio iti masakupanda idi nagdesisyon ti syudad a mangilukat iti turismo.
Kinunana a timmulong met ti syudad a nangipaay iti isolation facilities para kadagiti residente ti Itogon idi killaat a ngimmato ti kaso ti COVID-19 sadiay Itogon, Benguet.
Gapu iti dayta, mamati ni Yap nga ibilbilang ti Benguet ken Baguio City ti tunggal maysa kas pamilya nga addaan iti respeto ken panagkaykaysa.
Kagiddan iti dayta, kidkiddawenna ti pannakaadal ti advisory a naipaulog seknan iti restrictions ti byahe dagiti residente ti LISTT area a sumrek iti syudad ti Baguio
Impettengna a saan daytoy a kontra iti strikto a wagas tapnu malapdan ti panagwaras ti virus ngem kinunana nga agpada a tarigagay ti Benguet ken Baguio City a maparmek ti virus isut gapuna a masapul ti panagkaykaysa tapno maaddaan iti win-win solution.
Sakbay ti panagapela ni Yap, adu a residente ti Benguet ti nangkontra iti pammilin ni Magalong gapu ta sigun kadagitoy, kanayonan a kalbaryo ti panagala kadagiti requirements tapno makastrek dagitoy iti siudad ti Baguio.
