Maur-uray paylaeng ti pannakaaprobar ti intermodal terminal para kadagiti buses nga agturong iti siudad ti Baguio no sadino manamnama a maipasdek daytoy sadiay Dontogan, Baguio City.
Iti pannakiuman ti Bombo Radyo kenni Engr. Bonifacio Dela Peña-City Administrator iti siudad ti Baguio, kinunana nga ur-urayen dagitoy ti panang-aprobar ti city council iti nasao a proyekto agsipud ta ag-expire inton June 2 ti papel dagitoy.
Gapu iti dayta, kinunana a possible a maipatungpal ti public consultation inton May 30, 2025 ken ditoy a mangngegan no maaprobaran wenno saan.
Sigun kenni Dela Peña iti kanito a maaprobaran daytoy ket agaramidda iti term of reference ken kalpasan dayta ket ti public bidding no sadino ditoy a mapili dagiti mangabak a contractor nga agaramid iti nasao a proyekto.
Kabayatanna, inlawlawagna metlaeng a no malpas ti nasao a proyekto ket amin a buses a lumabas iti Marcos Highway ket ditoy dan nga agparada no sadino dagiti pasaheros dagitoy ket adda ti mailatang a paglugananda paturong iti sentro ti siudad.
Nupay kasta,possible a ngumato ti pamasahe gaputa adu dagiti kasapulan nga adjustments.
Innayon pay ni Dela Peña a target dagitoy a maileppas ti nasao a proyekto iti uneg ti nasurok a maysa a tawen no sadino ti idevelopda laeng a lote manipud iti 10 nga ektarya ken dua agingga tallo laeng.
