BAGUIO CITY- Pangpanggepen ti Bureau of Fire Protection-Baguio a makargaan iti standpipe dagiti lugar nga adayo kadagiti pathways wenno kalsada.
Panggep daytoy tapno makatulong iti panagrespondeda kadagiti uram, nangruna nu saan nga umanay dagiti fire trucks a sumrek wenno umasideg kadagiti lugar a maur-uram.
Sigun kenni Senior Fire Officer 1 Lloyd Ashley Furigay, pannakangiwat ti Bureau of Fire Protection-Baguio, napanunotda daytoy kalpasan iti napasaranda a parikut iti panagresponde kadagiti napalpalabas nga uram iti siyudad, pakairamanan iti napasamak nga uram itay laeng nabiit idiay Sunnyside Fairview barangay, Baguio city.
Kinunana a mangisaysayangkatda ti hazard mapping tapno ma-identify wenno mabigbig dagiti lugar a maikkan ti standpipes nu sadino maysa ditoyen ti nadakamat a lugar.
Malaksid iti dayta, nagpalagip daytoy iti publiko tapno maliklikan wenno malapdan ti insidente ti uram.
Idagdagadagna a kasapulan nga agbalin a responsable ti tunggal maysa tapno awan ti mabiktima ti uram.
