BAGUIO CITY – Inkalintegan ti consultant ti Traffic and Transportation Management Committee (TTMC) ti Baguio City ti panakaipalubos ti panagbiahe dagiti amin a taxi units ditoy siudad manipud inton Lunes, December 23 agingga inton tapos, December 31.
Iti interview ti Bombo Radyo Baguio kenni Engr. Teodorico Tan, kinunana a daytoy ket gapu iti adu a reklamo a maaw-awat ti mayor seknan iti rigat dagiti tattao a makalugan.
Sigun kenkuana, kas sungbat ket inruar ti Technical Working Group ti TTMC ti baro a traffic advisory para kadagiti taxi units ditoy siudad.
Kinunana a nangrugi idi kalman agingga inton Dominggo, December 22 ket nanayonan ti one-digit number dagiti napalubusan nga agbiahe.
Innayonna nga iti met December 23 agingga December 31 ket aminen a taxi units ket mabalin nga agbiahe ken inton Enero ti sumaruno a tawen ket 7-digits plate number dagiti agbiahe.
Kagiddan iti daytoy, iyap-apela ni Tan ti panangilaylayon dagiti operators ken drivers dagiti parapasahero a jeep iti panagbiahe wenno operasyon dagitoy ita a holiday season gapu iti kaadu dagiti pasahero.
Kinunana a no mabalin ket adda latta ti makita nga agbibiahe a parapasahero a jeep iti agingga iti alas-nuebe wenno alas-nuebe trenta iti rabii.
