BAGUIO CITY- Mangnamnama ti Alliance of Concerned Teachers iti Cordillera a risuten ni Vice President Elect-Sara Duterte ti parikut dagiti mannursuro kalpasan a nadutukan daytoy kas sekretarya ti Department of Education.
Iti interview ti Bombo Radyo Baguio, kinuna ni Jeanette Cawiding a namnamaen dagitoy a tungpalen ti bise presidente dagiti immunan nga inkari ti amana a ni outgoing president Rodrigo Duterte.
Dinakamat ni Cawiding nga agleppasen ti termino ni President Duterte ngem saan paylaeng a napasamak ti inkarina a madoble ti sweldo dagiti mannursuro.
Innayonna nga adda metlaeng ti 77 nga excess work wenno aldaw a nagtrabahoan dagiti manursursuro iti school year 2020-2021 a saan pay a nabayadan.
Impettengna pay a posible nga agtrabaho dagiti mannursuro iti umay a bulan kas maibasar iti waragawag ti DepEd para iti enrichment classes dagiti estudyante a nakaala iti nababa a grado.
Gapu iti daytoy, kidkiddawen ti Alliance of Concerned Teachers iti Cordillera a risuten ti sumaruno nga administrasyon ti pakaseknan dagiti mannursuro partikular ti pannakaipangato ti sweldo dagitoy.
Impeksa ni Cawiding nga ad-adda pay a rinmigat ti sitwasyon dagiti manursuro sipud nangrugi ti COVID-19 pandemic gapu kadagiti nagad-ado a paper works partikular ti modules a nasken nga isagana dagitoy.
