BAGUIO CITY – Inkalintegan ti Commission on Elections (COMELEC-Baguio) ti pannakaipataw ti buwis iti sweldo dagiti agserbi kas electoral boards iti May 9, 2022 elections.
Kasaruno paylaeng daytoy ti apela dagiti sumagmamano a grupo ti mannursuro iti National Capital Region a panakaikkat ti buwis iti sweldo dagitoy kabayatan ti eleksion.
Iti interview ti Bombo Radyo Baguio kenni City Acting Election Officer Atty. REYMAN Solbita, kinuna nga nailanad iti linteg ti pannakaipataw ti kaskenan nga buwis para iti nasao nga banag wenno paset ti TRAIN Law ti pagilian.
Sigun kenkuana kanayunan a sweldo dagiti mannursuro ti maawatda kabayatan ti panagsanay wenno panagserbida tunggal eleksion isunga mapatawan ti buwis.
Kas paset met iti baru nga program iti sidong ti TRAIN Law ket makidkiddaw ti 20% a buwis iti tinawen nga sweldo dagiti empleyado a sumurok iti P250-K ken mailaksid met dagiti nababbaba iti nasao nga gatad.
Kabayatanna, imbinglay ni Atty. Solbita nga awan pay ti kanayunan a panagbalbaliw iti honoraria dagiti mannursuro nga agserbi intun eleksion malaksid iti immunan nga impaulog ti COMELEC.
Iti Comelec Resolution 10727, ngimmato iti P3,000 ti maawat nga honoraria dagitoy a pakairamanan ti travel allowance, communication allowance, COVID-19 allowance ken dadduma pay malaksid iti P2-K a maawtada kabayatan ti panagsanay dagitoy.
Inlawlawag pay ni Atty. Solbita a saan a maiparit ti panagserbi dagiti natataengan wenno addaan iti commorbidities nga mannursuro nga agserbi kabayatan ti eleksion.
Nupay kasta, idiadiayada kadagitoy ti panagserbida kas support staff nangruna ta kasapulan nga IT knowledgeable dagiti maipangruna a maala kas electoral boards.
