BAGUIO CITY – Nilawlawagan ti COMELEC-Baguio ti agwarwaras a damag nga adda ti naipila iti opisinada nga election protest idi Mayo 20 kontra kenni incumbent Councilor Leah Aromin Fariñas.
Iti panakiuman ti Bombo Radyo Baguio, kinuna ni Election Officer Atty. Reynan Solbita nga awan ti naawatda nga election protest manipud kenni Emelyn Alcaraz Ortega gaputa saan daytoy nga jurisdiction ti COMELEC.
Impettengna a nu adda man ti election protest dagiti City councilor, vice-mayor ken mayor ket maipila iti COMELEC Central Office/Manila ken iti Regional Trial Court dagiti municipal officials bayat a dagiti barangay officials ket iti Municipal Trial Court wenno iti 1st level court.
Inayonna a nu adda met ti election protest dagiti kongresista ket jurisdiction daytoy ti House of Representatives Electoral Tribunal bayat a jurisdiction ti COMELEC en banc kadagiti met board member, vice-governor ken governor.
Gapu iti daytoy, impaganetgetna a ti election protest ni Emelyn Alcaraz Ortega, maysa kadagiti naabak a kandidato a nagtaray iti kina-konsehal ti Baguio City, ket naipila iti korte gaputa dagitoy ti addaan bileg nga agdesisyon.
Maipalagip a nakaala ni Ortega iti 54,223 a botos rason a nagun-odna ti maika-sangapulo ket tallo a pwesto bayat a nakaala met ni Fariñas iti 58,145 rason tapno isuna ti mangkompleto iti maika-sangapulo ket dua a pwesto iti legislative body.
Maibasar iti protesta, saan a pabor ni Ortega iti nagbalin a resulta ti botos kadagiti sangapulo a barangay nga addaan iti 46 clustered precints pakairamanan ti Asin, Bakakeng Central, Camp 8, City Camp Central, City Camp Proper, DPS, Engineer’s Hill, Irisan, Marcoville, ken Pacdal.
Mamati ni Ortega nga adda ti napasamak nga anomalya iti kaleppas nga eleksyon nu sadino kinunana a naikkat ti nagan dagiti daduma botante iti computerized list of voters rason a saanda a nakabotos.
Mamati pay daytoy nga adda ti napasamak a vote-buying kabayatan ti panagkampanya agingga iti kaaldawan ti eleksyon kas maibasar iti statement dagiti witness.
Gapu iti dayta, kidkiddawen ti kampo ni Ortega iti COMELEC-Baguio ti panakabilang manen dagiti botos manipud kadagiti nadakamat a clustered precints.
Malaksid iti daytoy, kidkiddawen pay ti kampo ti “direct manual count” dagiti 8,156 a na-reject a balota ken amin dagiti botos para kenkuana ket mainayon iti pakabuklan a botos daytoy.
