Nangrugin a napagtalantanan iti Korte Suprema ti maipapan iti pannakayakar ti pondo ti PhilHealth iti National Treasury a mausar kadagiti dadduma a proyekto ti gobierno.
Indatag dagiti nagpetision no apay a maikontra iti konstitusion ti pannakayakar dagiti saan a nausar a pondo ti PhilHealth.
Inyebkas dagiti petitioners ti saanda a panagkanunong iti sirkular ti Department of Finance ken ti pannakaipaay ti General Appropriations Act, a nanglukat iti dalan para iti pannakaisubli ti dandani P90 billion a pondo ti PhilHealth iti National Treasury.
Iti napalabas a tawen, inremit ti PhilHealth ti P60 billion iti National Treasury bayat nga insardeng ti korte ti pannakaiyakar ti nabati a P29.9 billion kalpasan a naipila ti petision.
Nakipaset iti panagdinggeg da Finance Secretary Ralph Recto, Health Secretary Teodoro Herbosa, Social Welfare Secretary Rex Gatchalian, ken sigud a PhilHealth president Emmanuel Ledesma Jr.
Dagiti respondent ket imbagi ti Office of the Solicitor General ken ti Office of the Government Corporate Counsel.
Sigun kadagiti respondents, ti pannayakar ti pondo ti PhilHealth ket ligal ken adda iti sidong ti konstitusion.
Sakbay ti panagtalantan iti nasao a banag, nangisayangkat ti sumagmamano a grupo ti protesta iti ruar ti Korte Suprema.
