Maisingsingasing ti paglintegan a panakaipaay iti pannusa a patay kadagiti amin a public officials iti pagilian a mapaneknekan a nagbasol partikular kadagiti kaso a graft and corruption; malversation of public funds; ken plunder.
Imprisinta ni Zamboanga City 1st district Representative Khymer Adan Olaso ti House Bill 11211 wenno ti Death Penalty for Corruption Act a mangipaay iti bileg a papatayen dagiti guilty nga opisyales kadagiti nadakamat a panaglabsing babaen iti “firing squad.”
Sakupen daytoy ti amin nga opiyales iti gobyerno manipod iti presidente iti pagilian agingga kadagiti opisyales iti barangay.
Karaman pay ditoy dagiti agserserbi kadagiti tallo a sanga iti gobyerno(legislative, executive,ken judicial); constitutional commissions; GOCCs; kasta metten dagiti miyembro iti Armed Forces of the Philippines ken ti Philippine National Police.
Nakalanad pay iti nasao a singasing a sakbay a maipaay ti hatol, masigurado ti panakaipatungpal iti “due process” ken proteksyon kasta met a mapalubusan dagiti akusado a mangaramat kadagiti anyaman a legal remedies para kadakuada.
Ti nasao a gakat ket maisingsingasing gapu iti maob-obserbaran dagiti sumagmamano a manmanday-linteg a panagtultuloy iti korapsyon a makaap-apektar iti social, economic ken political a pagdur-asan iti Pilipinas.
