BAGUIO CITY – Nauram ti dakkel a paset ti maysa a parapasahero a bus sadiay Pugo, La Union idi malem kalman.
Iti panakiyuman ti Bombo Radyo Baguio kenni PCapt Nestor Juanbe, dadaulo ti Pugo PNP, kinunana nagtaud ti nasao a bus ditoy siudad ti Baguio ken agturong koma sadiay Manila.
Kinunana a naduktalan iti imbestigasyonda a nagtaud ti uram iti bimmara ken immasok a pilid iti kanigid a paset ti bus.
Nadlaw ti driver ti umas-asok a pilid ti bus isut gapuna nga insardengna pay daytoy iti deppaar ti Pugo-Rosario Road ken pinababana dagiti pasahero.
Nauram met ti dakkel a paset ti lugan pakairamanan dagiti tugawan gapo iti napartak a panagkayamkam ti apoy.
Dagos a nagresponde dagiti bombero ti Rosario, La Union para iti panakasebseb ti nasao nga uram.
Immakar met dagiti pasahero iti sabali a lugan bayat a nangitunda iti apagbiit nga ilet iti gunay ti trapiko ti nasao nga insidente.
