Nagkedked a mangipaay ti kumpirmasion ni President Ferdinand Marcos Jr. seknan iti sayangguseng a pannakipaset ni Baguio City Mayor Benjamin Magalong iti mabukbukel nga independent commission a mangimbestigar kadagiti naanomalyaan a flood control projects ti Department of Public Works and Highways (DPWH).
Iti maysa nga ambush interview idiay Zambales, nadamag ti presidente nu opisial kadi a paset ti independent commission ni Magalong, ngem kinuna ti presidente a saan pay a nalpas ti panangbukel ti komision ken ur-urayenda paylaeng nga agbalin a pinal ti panggepda sakbay a maipablaak iti publiko.
Sigun iti Presidential Communications Office (PCO), ti mabukbukel nga Independent Commission to Investigate Flood Control Anomalies ket mangrisut iti iregularidad, sungbatan dagiti responsable nga indibidual, ken isubli ti panagtalek ti publiko iti panaggasto iti imprastruktura.
Maipalagip a nangisubmitir ti document folder ni Magalong kenni President Marcos Jr. a maibagbaga a naglon ti impormasion seknan kadagiti iregularidad iti sumagmamano a flood control projects.
Numan pay saan a naidetalye ti linaon daytoy, nabayagen nga ibagbaga ni Mayor Magalong nga idatagna iti presidente nasao nga ebidensia.
Sakbay daytoy, nadakamat ni Magalong iti pannakiuman ti Bombo Radyo a posible a karaman ti 57 a mammanday-linteg kadagiti proyekto ti nasao nga ahensia.
