BAGUIO CITY – Im-imbestigaranen dagiti operatiba ti PDEA-Cordillera dagiti nabigbigda a persons of interest nga utek iti panakai-deliver iti lokalidad dagiti iligal a droga kasaruno ti naisayangkat a controlled delivery operation sadiay Gibraltar, Baguio City idi napalabas a bulan ti Agosto a nakakumpiskaran ti nasurok P3-M ti gatadna nga ecstacy pills.
Sigun kenni PDEA-Cordillera Regional Director Gil Castro, manarimaanen ti background investigation kadagiti nasao a persons of interest babaen kadagiti address a nakasurat iti parcel.
Kinunana a rumrumuar iti immuna nga imbestigasyonda a ti kostumer wenno pakailaklakuan dagiti party drugs ket kadagiti ganganaet.
Dinakamatna nga iti pay imbestigasyonda ket awan pay ti nailako a party drugs ditoy siudad ngem ketdi, gangandaten laeng dagiti suspek a pagbalinen ti Baguio City kas distribution hub dagiti party drugs.
Nupay kasta, impettengna a saanda nga ipalubos a pagbalinen dagiti nasao nga indbidual a distribution hub ti party drugs ti siudad.
Maipalagip a ti parcel a naipasidong iti controlled delivery operation ket nagtaud kenni Fostina Obobo manipud Neuss, Germany ken ti recipient wenno consignee ket ni Joyce Ann Jores San Antonio nupay ti managan Elisa Agguirre Millare a maysa a drug personality ti nangawat iti parcel a nagresulta iti panakatiliw daytoy.
