Inotorisaan ti korte iti Makati a mangipatungpal dagiti otoridad ti “digital forensic examination” kadagiti “high-tech” ken “military-grade devices” a narekober manipod iti Chinese citizen a nakemmeg idi napalabas a bulan.
Impaulog ti korte ti “warrant to disclose computer data” iti Philippine National Police (PNP) kalpasan a naduktalan iti probable cause.
Babaen ti bileg ti “warrant to disclose computer data” (WDCD), kinuna ti korte ti Makati a naotorisaan ti PNP-Criminal Investigation and Detection Group (CIDG) a mangiturong kadagiti opisial manipud iti Anti-Cybercrime Group a dagus a mangisayangkat iti digital forensic examination.
Naibilin pay iti PNP-Criminal Investigation and Detection Group (CIDG) nga usarenda ti datos a maalada para iti panangipila ti kaso.
Indagadag pay ti korte iti CIDG a mangisubmitir wenno i-turn over iti kostodiya ti korte dagiti naala a datos.
Karaman kadagiti banag a sukimaten dagiti otoridad ket pakairamanan ti Iphone 15, maysa nga antenna system multi-band directional, dua a pidaso iti “battery units” ken dadduma pay.
Idi bulan ti Mayo, nakemmeg ti maysa a Chinese citizen gapu iti panangtutokna ti paltog idiay Makati City.
Itay laeng nabiit, kinuna ti Armed Forces of the Philippines a suksukimatenda ti banag a narekober manipod iti Chinese national iti posible a panagaramatda para iti “communications hacking.”
Iti agdama, nakabalud ti Chinese national iti CIDG National Capital Region Custodial Center.
Naamuan a ti nasao nga indibidual ket mangmangged iti Philippine Offshore Gaming Operator ken agtataeng iti Pilipinas iti innem a tawen.
