LA TRINIDAD, BENGUET – Manamnaman a mailukat ti Pines Park Bridge idiay Balili, La Trinidad, Benguet inton sumaruno a tawen.
Iti interview ti Bombo Radyo, kinuna ni Mayor Romeo Salda a kas maibasar iti impatungpalda nga inspeksyon ket 96.87% ti naipalpas iti nasao a proyekto.
Impettengna a kasapulan pay ti kanayonan a manpower a mangaramid iti Pines Park Bridge para iti dagus a pannakaipalpas daytoy.
Iti agdama ket imbinglay ti Mayor a maisaksakad ti public consultation kadagiti umili tapno maituloy ti kontruksyon ti nasao a rangtay agingga iti national road.
Malaksid iti dayta, impettengna pay a maisaksakad ti consultation para kadagiti umili iti agsinnumbangir a rangtay para iti panakaituloy daytoy paturong iti national road.
Maipalagip a nangrugi ti kontruksyon ti 77 million pesos ti gatadna a Pines Park Bridge idi Oktobre dos mil baente dos ken naituding a makompleto daytoy idi Oktobre ti agdama a tawen ngem saan a nasurot gapu kadagiti nagduduma a rason.//Rosemarie Bulsao
