BAGUIO CITY – Agtaltalinaed a nasayaat ti kasasaad dagiti Pinoy workers iti pagilian a Kazakhstan iti baet ti krisis nga intunda ti COVID-19 pandemic.
Iti eksklusibo nga interbyu ti Bombo Radyo-Baguio ken ni Roger Ramos Leal, maysa a Pinoy teacher sadiay Almaty City, Kazakhstan, kinunana a nagsaludsod daytoy kadagiti grupo dagiti Pilipino sadiay ken awan ti nadamagna a dakkel a parikot maipapan kadakuada.
Dinakamatna a kadawyan a dagiti Pinoy sadiay ket agtatrabaho kadagiti petroleum companies bayat nga adda met dagiti mannursuro kas kenkuana.
Kinunana a manipud April 12 ket nagbalinen nga online ti panagisuroda kalpasan ti panagrikep dagiti pagadalan.
Nupay kasta, kinunana a ti parikot ti dadduma a Pinoy teacher sadiay ket ti pannakakessay ti sueldo dagitoy gapu iti nabaliwan a sistema iti panagisuro.
Mainaig iti daytoy ket kinuna ni Leal a natulnog dagiti tattao sadiay kadagiti paglintegan ti lockdown.
Sigun kenkuana, nainget ti panangsurot dagiti tattao sadiay iti curfew gapu ta dagiti aglabsing ket dagus a makemmeg ken maibalud.
Innayonna a saan laeng nga ordinario a quarantine ti maipatpatungpal kadagiti sumrek sadiay Kazakhstan no di ket maipaspasidong dagitoy iti nainget nga isolation.
