Manarimaan ti panagsagana ti Philippine Military Academy (PMA) para iti umadanin a panagturpos dagiti kadete ti Philippine Military Academy (PMA) Bagong Sinag Class of 2024 inton Sabado, Mayo dise otso sadiay Fort Gregorio del Pilar, Baguio City.
Iti exclusive interview ti Bombo Radyo kenni Major Charito Dulay, Philippine Military Academy (PMA) public officer, impakaamona a makikikoordinardan iti Opisina ni President Ferdinand “Bongbong” Marcos Jr. para iti nasao a Commencement exercise bayat a dagiti kadete ket manarimaan ti rehearsalsda para kadagiti nagduduma nga aktibidad nga aramidenda, saan laeng a maipapan iti panagturpos dagitoy.
Sigun kenni Dulay, manamnama ti panakipaset dagiti nangkakangato nga opisyales iti pagilian a Pilipinas inton Sabado bayat a manamnama dagiti isasangpet dagiti nagannak dagiti kadete inton sumarsaruno nga aldaw nangruna dagiti agtaud kadagiti adayo a lugar kas iti Visayas ken Mindanao.
Kadawyan met a mapaspasamak ti panagturpos dagiti kadete tunggal Domingo nupay kasta, daytoy ket naka-skediul inton Sabado ita a tawen agsipud ta daytoy ti availability ni President Ferdinand Marcos Jr.
Iti manamnama a panagturpos dagiti kadete ti Philippine Military Academy (PMA) Bagong Sinag Class of 2024, daytoy ket buklen ti 278 a kadete a pakairamanan ti 224 a lallaki ken 54 a babbai.
Manipud iti nasao a bilang, 144 ti sumrek iti Philippine Army; 62 iti Philippine Air Force, ken 72 iti Philippine Navy.
Kabayatanna, kinuna ni Dulay a nangrugin ti enrollment para kadagiti manamnama a mangbukel iti Philippine Military Academy Class of 2029 idi Mayo a uno iti agdama a tawen bayat nga agleppas daytoy inton Agosto.
Gapu iti dayta, al-allukoyenna dagiti amin nga interesado nga agbalin a paset ti Philippine Military Academy nga ag-enroll dagitoy.
Sigun kenni Dulay, mangnamnama dagitoy nga agarup 43-K met laeng ti agaplikar nga kadete kas idi napalabas a tawen nupay kasta, 350 laeng dagiti mapili, ti agbalin a cream of the crop iti nasao nga akademya.
Impeksa ni Dulay nga iti panagserrek dagiti kadete iti nasao nga akademya ket kasapulan ti determinasyon ken ti panagbalin nga open kadagiti amin a posibilidad tapno adda a ma-surviveda dagiti ado a karit a masangoda bayat ti panagadalda.//M
