Imbutaktak ni Philippine National Police (PNP) chief General Nicolas Torre III nga addan ti iggem ti tracker team dagitoy nga impormasion iti paglemlemmengan ni sigud a Bureau of Corrections (BuCor) chief Gerald Bantag.
Sigun kenni Torre, ur-urayenda laengen ti umno a tiempo tapno tilliawen ti napapanaw a hepe ti nasao nga ahensia.
Maipalagip a nabayagen nga aglemlemmeng ni Bantag kalpasan a naitudo isuna a mastermind iti pammapatay iti radio broadcaster a ni Percy Lapid idiay Las Piñas City nga asideg iti pagtaenganna idi Oktubre 3, 2022.
Naamuan a ni Lapid ket kritiko ni Bantag.
Iti agdama, adda ti warrant of arrest metlaeng ni Bantag iti mapapati a panangibaonna a pattayen ni Cristito Villamor Palaña a mapapati a nagserbi kas middleman iti pammapatay kenni Lapid.
