![](https://img.bomboradyo.com/baguio/2019/08/city-hall.jpg)
BAGUIO CITY – Naituding a kiddawen ti Mines and Geosciences Bureau (MGB) – Cordillera ti panangikonsidera ni Baguio City Representative Marquez Go iti panakailaksid ti sumagmamano a mineral reservation areas ditoy Baguio manipud iti impila daytoy a mining free zone bill para iti siudad.
Sigun kenni MGB – Cordillera Regional Director Faye Apil, adda dagiti mineral reservation areas ditoy Baguio a mabalin nga agtalinaed a mining sites wenno pagminasan dagiti small-scale miners no dagitoy a disso ket maikonsidera a non-livable wenno saan a mabalin a pagnaedan gapu iti lokasyonda.
Kinunana a nasken a maadal no dagiti nasao a disso ket awananen ti paka-aramatan para iti mineral.
Dinakamatna nga agarup 500 nga ektarya ditoy siudad ti mabalin a maaramat kas mining sites.
Maipalagip nga impila ni Go ti House Bill 5619 a mangideklara iti Baguio kas mining free zone kas sungbat iti kumarkaro a geohazards ken environmental threats iti masakupan ti City of Pines gapu iti panagminas.
Naamuan a dua ti mineral reservations iti siudad ken dagitoy ket ti 380 nga ektarya sadiay Barangay Loakan Apugan, Barangay Atok Trail ken Barangay Kias ken ti 159 nga ektarya sadiay Barangay Mines View ken Barangay Lucban.