Nangipaulog ni President Ferdinand Marcos Jr. iti executive order a mangbukel iti inter-agency committee on international humanitarian law (IAC-IHL), nga agserbi a national committee tapno matulongan dagiti maseknan nga otoridad ti gobierno a mangtungpal kadagiti “set of standards” ken pagalagadan tapno masalakniban dagiti tattao a saan a direkta wenno saanen a karaman kadagiti armado a panagdadangadang.
Ti Executive Order No. 77 a napirmaan idi Nobiembre 22 ket mangibagbaga nga adda dagiti nadumaduma a linteg ti Pilipinas a maitunos iti international humanitarian law kas iti Philippine Act on Crimes Against IHL, Genocide, and Other Crimes Against Humanity ken ti Special Protection of Children in Situations of Armed Conflict Conflict.
Dinakamat pay ti EO ti resolusion nga inadaptar ti International Conference of the Red Cross and Red Crescent idi 2019 a mangparegta iti Pilipinas ken dadduma pay a pagilian a mangbukel iti bukodda a nasional a komite tapno matulongan dagiti otoridad iti pannakaipatungpal ti IHL.
Ti inter-agency committee on international humanitarian law (IAC-IHL) ket agserbi kas “focal point” para iti koordinasion ken panagtitinnulong ti Pilipinas babaen ti panangitandudo ken panagtungpal ti IHL sakbay, bayat ken kalpasan dagiti gubat wenno armado a panagdadangadang.
Kasapulan a makikoordinar ken makitinnulong iti maseknan nga ahensia ti gobierno kasta metten kadagiti civil society groups, akademya, ken dadduma pay iti panangitandudo iti International Humanitarian Law (IHL).
Ti pondo para iti inter-agency committee ket agtaud kadagiti miembro nga ahensia.
