Pinadayawan ni President Ferdinand Marcos Jr. dagiti wage workers, teachers, health workers, civil servants ken mannalon ita nga aldaw kagiddan ti panakarambak ti National Heroes Day.
Sigun kenni Marcos Jr., ti kontribusyon dagitoy iti pagilian ket dakkel ken napateg iti laksid ti panagbalinda nga “unsung heroes” wenno ti saanda unay a panakabigbig.
Kinuna ni Marcos Jr. nga ita nga aldaw ket mapadayawan dagiti unsung heroes ti pagilian, dagiti mannalon a mang-ub-ubra kadagiti taltalon wenno garden, dagiti wage earners a mangpaysasayaat iti ekonomiya ti pagilian, dagiti mannursuro a mangsursuro kadagiti ubbing, dagiti healthcare workers a mangis-ispal iti biyag, dagiti civil servants a mangresreponde iti pagkasapulan ti publiko kasta met kadagiti tunggal indibidual a mangipakpakita iti simple nga aramid iti kinaimbag kadagiti daduma a tattao.
Iti sabali a bangir, pinadayawan met ni Marcos Jr. dagiti bannuar a nangilaban iti pagilian, ti sakripisyo dagitoy tapno magun-od ti panakawaya-waya a mapaspasaran dagiti Pilipino iti agdama.
Impeksa ti presidente a dagiti bannuar ti pagilian ket nangipakita iti courage, resilience ken patriotism.
Binigbig ni Marcos Jr. dagiti bannuar kas ken da Lapu-Lapu, Andres Bonifacio, Jose Rizal, Apolinario Mabini, Emilio Jacinto ken dagiti amin nga indibidual a nangibuwis iti biyagda para iti pagilian.
