Inlawlawag ni President Ferdinand Marcos Jr. a saan pay daytoy makaipaay iti konklusyon seknan iti panakairaman ni House Speaker Martin Romualdez kadagiti naanomalyaan a flood control projects kalpasan nga inname-drop daytoy dagiti Discaya.
Sigun kenni Marcos Jr., dagiti dinakamat dagiti Discaya ket maibilang paylaeng nga alegasyon ken kasapulan paylaeng a maimbestigaran nu substancial wenno adda ti kinapudnona.
Innayonna a saan a parikut ti pananginame-drop gapu ta saan met a krimen daytoy ngem impettengna a nu agaramat iti nagan ti sabali a tao tapno makapagtakaw ket maibilang a krimen.
Maipalagip nga idi laeng Lunes ket imbinsa-binsa dagiti Discaya ti nagan dagiti Kongresista ken opisyales a sigun kadakuada ket nakaala iti kickback kadagiti proyekto nga iggemda.
Imbinsa-binsada metlaeng dagiti daduma nga opisyales iti Department of Public Works and Highways a maatap nga adda pakainaiganna kadagiti kontrobersyal a proyekto.
Nairaman metlaeng ni House Speaker Romualdez a maatap a nangaprubar kadagiti unprogrammed appropriations ken insertions.
