BAGUIO CITY – Naobserbaran ti agtultutloy a panangngato ti presyo dagiti burias iti probinsia ti Benguet gapu paylaeng iti epekto ti African Swine Fever (ASF) sadiay.
Iti panakiuman ti Bombo Radyo Baguio, kinuna ni Provincial Veterinarian Dr. Miriam Tiongan a saan laeng a karne ti baboy ti ngimmina ita ngem ketdi, uray pay dagiti burias gapu iti kaawan ti paggatangan wenno pagalaan dagiti agtartaraken ti baboy.
Dinakamatna nga iti kaudian a panagwanawanda iti presyo ti burias ket dumanonen iti P6,000 agingga P6,500 ti presyo ti maysa a burias manipud iti sigud a presyoda a P5,000.
Innayonna a nangato ti pagkasapulan iti burias gaputa adu met latta dagiti hog raisers ti agtarigagay nga agtaraken ti baboy iti baet ti panakalugida gapu iti outbreak ti ASF.
Kinunana pay a kadagiti laeng naideklara a green zones wenno lugar nga awanan ti kaso ti ASF ti mabalin a pagtaudan dagiti burias a mataraken ita iti probinsia .
Kabayatanna, pagyamyamanan ni Dr. Tiongan ti kaawan ti kaso ti ASF a nailista iti probinsia ti Benguet ita a bulan ti Abril.
Maipalagip a kaudian a kaso ti ASF a nailista iti Benguet ket idi pay napalabas a a bulan ti Marso.
Mangnamnamada pay a maikkaten ti ASF iti probinsia tapnu maituloy ti narugiandan a swine repopulation ken makarekober metten dagiti hog raisers a nalugi gapu iti panagraira ti ASF kadagiti napalpalabas a bulan.
