Ngimmato manen ti presyo dagiti imported a bagas iti merkado publiko iti siudad ti Baguio.
Iti pannakiuman ti Bombo Radyo kenni John Paul Peralta, local rice dealer iti Baguio City Public Market, kinunana a ngimmato daytoy idi napalabas a lawas gapu paylaeng iti kinakurang ti suplay ti bagas.
Malaksid iti dayta, bimmasit metlaeng ti suplay nga agtataud kadagiti kangrunaan a producers kas idiay Isabela, Cagayan ken Nueva Vizcaya gapu paylaeng iti pannakaapektarda kadagiti naglabas a bagyo.
Gapu iti daytoy,kinuna ni John Paul a ngimmato iti P60 agingga P65 ti presyo dagiti imported rice tunggal kilo manipud iti sigud a presyo daytoy a P56.
Sigun kenkuana, kaadduan a maib-ibus ket dagiti imported rice isu’t gapuna a daytoy ti maysa a rason ti panagngato ti presyo daytoy.
Nupay kasta, nakastock met dagiti sumagmamano a retailers ken dealers iti siudad rason nga adda met dagiti nababbaba a bagas kas kadagiti regular well milled rice a magatang iti P40 agingga P45.
Impasiguradona metlaeng nga adda ti umdas a suplay ti nasao a produkto agsipud ta adda ti stock dagitoy.
Iti agdama,makikikoordinar met dagitoy kadagiti rice dealers ken retailers idiay Metro Manila para tapno makagatang iti nababbaba a presyo ti suplay ti bagas.
