KENYA- Intuloy manen dagiti protesters nga agprotesta idiay Kenya uray imbabawi ni President William Ruto ti kanayunan a buis para kadagiti sumagmamano a tagilako.
Ginasgasut nga indibidual ti nagturong iti kalsada tapno agprotesta dagitoy tapno agresign iti puwesto ti nasao a presidente.
Dagus met a nilapdan dagitoy dagiti soldada ken dagiti pulis iti central business district idiay Nairobi kalpasan a panggep dagitoy a panag-atake.
Ad-adu ti nagprotesta no idilig iti umuna a panagprotesta dagitoy ngem narangranggas ti naudi gaputa agarup dua pulo nga indibidual ti pimmusay iti daytoy.
Nupay kasta, madanagan ti Kenya National Commission for Human Rights (KNCHR) iti panangusar dagiti pulis kadagiti armas a manglapped kadagiti agprotprotesta.
Ilablaban dagiti agprotprotesta iti agdama ti hustisya para kadagiti pimmusay a kakadua dagitoy bayat ti umuna a panagprotestada.//Rose
