BAGUIO CITY – Balballaagan ti dadaulo ti Traffic Enforcement Unit (TEU) ti Baguio City Police Office (BCPO) dagiti agididiaya ti transportasyon pastrek ditoy siudad ti Baguio babaen iti pribado a lugan kasukat ti panagplete ti agbalin a pasahero.
Iti interview ti Bombo Radyo Baguio, kinuna ni PLt.Col. Oliver Panabang a nasken nga isardengen dagiti maseknan ti nasao a kita ti serbisyo gaputa adun ti natiltiliwda a lugan a mangididiaya iti daytoy kas kadagiti biahe paturong sadiay Metro Manila, Ilocos Region, Central Luzon ken sumagmamano a probinsia iti Cordillera.
Dinakamatna nga adda ti yunit ti pulisya a mangtuttutuk iti nasao a kita ti serbisyo a maididiaya babaen iti social media isut gapuna a nalaka a mabigbigda dagitoy.
Sigun kenkuana, dagus a ma-impound ti pribado a lugan a naaramat iti nasao a serbisyo apaman nga aklonen ti pasahero a nagbayad daytoy iti plete.
Inyunay-unayna nga adda ti rason no apay nga adda dagiti paglintegan iti panagturong ditoy Baguio ken adda met dagiti parapasahero a bus a mabalin a pagluganan dagiti indibidual a kayatda ti agturong ditoy siudad.
Imbinglay pay ni Col. Panabang a kadawyan nga SUV ti pribado a lugan a maar-aramat iti nasao a serbisyo ken adda pay ti natiliwda a nagaramat iti rason nga agibiahe iti nateng.
