Nagbalakad ni Davao City 1st District Rep. Paolo Duterte kadagiti kakadwa daytoy iti House of Representatives seknan iti posible a panakaipila iti sabali manen nga impeachment complaint kontra iti kabsatna a ni Vice President Sara Duterte.
Sigun kenni Pulong, rumbeng a ti impeachment complaint ket repleksyon ti boses dagiti masakupan iti tunggal kongresista ken saan a dagiti manmano laeng nga addaan impluwensya wenno bileg a mangkonkontrol iti pondo ti umili.
Maipalagip nga idi napan a tawen ket napilaan ni Vice President Sara iti uppat nga impeachment complaints.
Dagiti tallo nga immuna ket impila dagiti pribado nga indibidwal ngem nadismisar dagitoy.
Ti maikapat nga impeachment complaint ken inaprubaran met iti Kamara idi February 2025 nu sadino, dimmanon iti 215 a kongresista ti pimmabor.
Nupay kasta, inkeddeng ti Korte Suprema nga unconstitutional daytoy gapu ta naglabsing iti one-year rule iti panakaipila ti nasao a reklamo.
Gapu ta ag-expire ti one-year bar rule iti naipila nga impeachment complaint kontra iti bise presidente, posible manen a maipila ti baro a reklamo.
Ni VP Sara ket sumangsango iti kaso mainaig iti panakaaramat iti confidential fund.
