BAGUIO CITY – Dakkel a pakaseknan dagiti drivers ken operators ti quota system ken kabit system kagiddan ti maisaksakad a Public Utility Vehicle Modernization Program iti agdama nga administrasyon.
Iti interview ti Bombo Radyo kenni Patricio Evangelista, Presidente ti Liga ng Transportasyon at Operators sa Pilipinas (LTOP) – Cordillera & Region 1, adu dagiti “irregularities” a makitkitada iti panagpaconsolidate nu sadino sumagmamano kadagitoy ket maatap a maigaggagara.
Sigun kenni Evangelista, arigna ket mapaspasamak ti kabit sytem nu sadino maar-aramat ti nagan ti maysa a legal entity ngem isu metlaeng nga isu dagiti operator nga agpatpataray kadagiti lugan.
Iti met quota system, masapol a magun-od dagiti drivers ti naituding a gatad a masapol a makolektarda iti maysa nga aldaw bayat ti panagpasadada tapno saan a makaltasan ti sahod dagitoy.
Innayon pay ni Evangelista a maysa pay kadagiti makitkita a problema iti consolidation ti nilaon ti affidavit of conformity ket arigna a maipalpalubos ti panakaikkat ti karbengan iti prangkisa iti kanito a pirmaan daytoy.
Malaksid iti dayta, mapan iti legal entity ti maipaay nga scrappage value dagiti madadael a daan a jeep kas paset ti downpayment dagiti nagpaconsolidate para iti baro a yunit.
Nupay kasta, dinakamat ti opisyal a manarimaan ti panakarebisar ti nilaon ti nasao a programa ken nailaylayon ti deadline ti panagpaconsolidate dagiti jeepney drivers ken operators nu sadino mabalinen dagiti daduma nga immunan a nagpaconsolidate kadagiti korporasyon ken kooperatiba ti agwithdraw.
Kagiddan dayta, impaganetget ni Evangelista a masapol a panunuten dagiti drivers ken operators a nalaeng dagiti agbalin a desisyonda.//Bombo Rob Dominguez
