BAGUIO CITY – Nalawlawagan ti rason iti panagreggaay ti rocknetting project sadiay Barangay Dalupirip, Itogon, Benguet idi napalabas a lawas.
Sigun iti Barangay Captain ti Dalupirip, Itogon, manarimaan ti clearing operation wenno panagdalus dagiti mangipatpatungpal iti nasao nga proyekto idi natnag wenno naitulid dagiti bato.
Kinunana a saan a pimmasa iti inspeksyon ti Department of Public Works and Highways (DPWH) ti sumagmamano a paset iti nadakamat a proyekto rason a naipasidong daytoy iti repair wenno restoration.
Impettengna a naigagara a binaklas dagiti workers ti screen ken net gaputa nasagid wenno nakalbot dagiti bato ken dinakamatna nga adda ti nakasagana a loader ken truck para iti naisayangkat a clearing iti nasao nga aldaw.
Innayon ti Brgy. Kapitan a naipakaammo kenkuana ti nadakamat nga addang ken naimatanganna ti mismo a panangitennag dagiti workers iti bato.
Iti agdama, agtultuloy iti panakatarimaan ti rocknetting project tapnu mipasigurado a natalged a dalyasaten dagiti umili ti nasao a kalsada nangruna ta malablabasan daytoy paruwar ken pa-uneg iti Barangay Dalupirip, Itogon, Benguet.
