BAGUIO CITY – Inlawlawag ti Department of Agriculture (DA) – Cordillera ti rason iti pannakaibelleng dagiti tone-tonelada a kamatis idiay Nueva Vizcaya.
Iti interview ti Bombo Radyo, kinuna ni Jonathan Llanes, Information Officer ti RAFIS iti Department of Agriculture (DA) – Cordillera, agarup 8,000 a kilo ti kamatis ti naibelleng iti bakante a lote kalpasan a saan a nakisabat dagiti buyer wenno trader a manggatang koma iti nasao a produkto.
Dagiti nasayang a kamatis ket buklen ti 70% a babassit bayat a 30% met dagiti dadakkel.
Dinakamat ni Llanes a naibiyahe dagiti kamatis idiay Nueva Vizcaya Agriculture Trading Center idi Nobyembre a trenta agingga Disyembre a singko ti agdama a tawen.
Dagiti naapit a kamatis ket mula dagiti lima a mannalon manipud idiay Dulli, Ambaguio, Nueva Vizcaya ken Tinoc, Ifugao.
Nagdesisyon dagitoy nga ibelleng laengen ti apitda gapu ta nadadaelen ken saan a mabalin a makan.
Kabayatanna, impetteng met ni Llanes a saan nga agsobsobra ti nateng partikular ti kamatis idiay Sitio Amiling, Almaguer North, Bambang, Nueva Vizcaya kas maibasar iti validation dagitoy.
Maar-aramid metten ti market-matching tapno maliklikan ti oversupply ti nadakamat a produkto.
Kabayatanna, al-allukoyen ni Llanes dagiti mannalon nga agparehistro dagitoy iti “Register System Basic Sectors in Agriculture” gapu ta daytoy ti basaran tapno maka-avail iti suporta ti Department of Agriculture.//Rosemarie Bulsao
