BAGUIO CITY – Manarimaan paylaeng ti imbestigasyon ti Bureau of Fire Protection – Baguio iti rason ti napasamak nga uram idiay Gaerlan Street, Brgy. Campo Filipino, Baguio City itay kanikadua.
Iti panakiuman ti Bombo Radyo kenni SFO1 Lloyd Ashley Furigay, panakangiwat ti Bureau of Fire Protection – Baguio, nangisubmitirda ti sample iti national headquarters dagitoy para iti analysis.
Maipalagip a totally damaged ti lima a balay bayat a dua ti partially damaged nu sadino sangapulo ket maysa a pamilya wenno lima pulo ket tallo nga indibidual ti naapektaran ken maysa nga indibidual ti pimmusay.
Kabayatanna, dumanon iti pito pulo ket uppat a fire incident ti narespondean ti opisina manipud Enero agingga iti agdama.
Sigun kenkuana, nangatngato daytoy nu idilig iti pito pulo ket siyam a fire incident manipud Enero agingga Disyembre idi napan a tawen.
Kinuna ni Furigay a ngimmato ti bilang iti narespondenda nga structural ken residential fire ita a tawen.
Iti sabali a bangir, inaklon ni SFO1 Lloyd Ashley Furigay a karaman kadagiti karit iti panagresponde dagitoy iti uram ket trapiko, ken water supply.
Sigun kenkuana, kitkitaenda dagiti barangay nga agdan laeng ti accessna ken nangisingasing dagitoy iti panakaikabil ti stand pipe a pakaisalpakan ti danum a mabalin a maaramat kadagiti lugar nga adayo iti kalsada a saan a madanon dagitoy.
Malaksid iti dayta, namnamaenda a manayonan pay ti uppat a fire stations iti siudad ti Baguio.
