BAGUIO CITY- Dumanon iti 356 nga 4th class cadets ti Philippine Military Academy (PMA) ti opisyal a karaman iti naballigi nga recognition rites a naangay itay agsapa sadiay Fort Del Pilar, Baguio City.
Karaman ditoy ti 285 nga lallaki ken 71 a babbai a mangbukel iti Sundalong Ibinigkis ng Katungkulan na Lakas ng Amang Bansang Malaya wenno Siklab-Laya Class of 2025.
Daytoy ket kalpasan ti 11 a bulan a nainget a panagsanayda a nangrugi idi Hunyo ti napan a tawen kalpasan ti Oath Taking Ceremony ken Incorporation rites dagitoy.
Naamoan a dumanon iti 19,308 nga agtutubo ti nakipaset iti entrance examination ti akademya idi napan a tawen nu sadinno 1,076 kadagitoy ti naipasidong iti selection ken deliberation ken 350 dagiti napili.
Dinar-ayan dagiti bisita partikular dagiti nagannak ken guardians ti aktibidad ken limitado laeng iti tallo ti nagbalin a bisita ti tunggal kadete.
Indaoloan met ni PMA Superintendent LTGEN Ferdinand Cartujano ti aktibidad ken nagserbi kas Guest of Honor ken Speaker ni Chief Justice Alexander Gesmundo.
