BAGUIO CITY – Manamnama a maituloy ti Phase 3 ti Service Contracting Program ti Land Transportation Franchising and Regulatory Board (LTFRB) ita a tawen.
Sigun kenni LTFRB-Cordillera Regional Director Engr. Lalaine Sobremonte, puntirya ti ahensya nga ipatungpal ti programa inton sumaruno a bulan ti Pebrero wenno inton Marso.
Kinunana a maisagsaganan dagiti pagalagadan iti panakaipatungpal ti programa ken maur-uray pay ti panakaipaluspos ti pondo a dumanon ti P7-B para iti entero a pagilian.
Innayonna nga awan pay ti nailatang a pondo para iti implementasyon ti programa ditoy rehion.
Impannakkelna pay a manayunan met ti agnumar iti programa gaputa mairamanen dagiti traditional public utility jeepneys iti daytoy.
Kabayatanna, agtultuloy latta met ti panangipaluspos ti LTFRB-Cordillera iti bayad dagiti nakipaset iti programa iti Phase 1 ti Libreng Sakay.
Kinuna ni Engr. Sobremonte a dumanonen iti 79% kadagiti drivers a nakipaset iti Phase 1 ti nabayadanen bayat a siento porsiento kadagiti nakipaset iti Phase 2 ti programa.
