BAGUIO CITY – Karaman ti rehiyon Cordillera nga agsagsagana iti posibilidad a panagkurang ti taraon iti masungad a bulan kas waragawag ni Department of Agriculture Secretary William Dar.
Daytoy ti kinumpirmar ni DA Cordillera Regional Director Dr. Cameron Odsey iti interview ti Bombo Radyo Baguio.
Sigun kenkuana, maisagsagana metlaeng dagiti tulong wenno assistance a maipapaay kadagiti mannalon tapnu agtultuloyda nga agmula iti pagkasapulan ken mapagtalinaed ti supply.
Impatalgedna met ti dakkel a kontribusyon ti rehiyon iti supply ti bagas a maysa kadagiti pagtataudan ti produksion nangruna iti probinsia ti Kalinga, Apayao ken Ifugao nu sadinno masuplayan ti intero a rehiyon nu addda man ti panagkurang ti supply iti taraon.
Malaksid iti dayta, adda latta met dagiti agtaltalon para iti produksion ti bagas wenno pagay iti dadduma pay nga probinsia ti rehiyon isunga saan a bumabbaba ti supply gaputa maminmintinir ti panagumula iti Cordillera.
Kagiddan iti dayta, karaman metlaeng ti rehiyon kadagiti kangrunaan a pagtataudan ti highland vegetables iti pagilian rason a saan unay a marikna ti parikot iti supply nu dumteng ti nasao nga panawen.
