BAGUIO CITY – Kidkidawen ti ama ti La Trinidad, Benguet ti panakaawat dagiti umili seknan iti panagkurang ti suplay ti danum iti masakupanna a munisipyo.
Kasaruno daytoy ti panagreklamo dagiti umili sadiay nga awan ti mapasangpetda a danum ken no adda man ket bassit laeng ti maur-urnong dagitoy.
Sigun kenni Mayor Romeo Salda, normal a mapasaran ti kinakurang ti suplay ti danum ita a kalgaw ngem kadagiti nangangato laeng a lugar partikular dagiti barangay a Lubas, Buyagan ken Tawang.
Inlawlawagna a narigat a sumang-at wenno mapadanon ti danum kadagiti nadakamat a barangay a rason iti bassit laeng a danum ti mapasangpet dagitoy.
Nupay kasta, impettengna nga ikagkagumaan ti lokal a gobyerno a papartaken ti panakaibangon ti maysa a watershed sadiay Shilan a napundoan iti P16-M para iti kanayonan a suplay ti danum iti munisipyo.
