BAGUIO CITY – Impanamnama ti National Police Commission (NAPOLCOM) – Cordillera a mairuar iti kabiitan a panawen ti resulta ti eksaminasyon a naipatungpal idi Abril.
Iti interview ti Bombo Radyo Baguio, inaklon ni Soledad Benwaren, Public Information Officer ti NAPOLCOM-CAR nga idi pay koma Abril a mairuar ti resulta ngem agingga ket awan pay ti impaulog ti central office.
Dinakamatna a gapu iti daytoy ket ado ti agdamdamag iti resulta nangruna dagiti uniformed personnel a nag-exam para iti panakaipromote dagitoy.
Nupay kasta, inlawlawag ni Benwaren a posible a mairuar daytoy iti sumarsaruno a lawas gaputa maur-uray laeng ti direktiba ti vice chairman ken executive officer ti NAPOLCOM.
Kabayatanna, impeksa ti opisyal a saan pay a sigurado nu matuloy ti sumaruno nga iskedyul ti eksaminasyon inton Oktobre gaputa awan ti pammilin manipud iti central office.
Impetteng ni Benwaren a posible a maitantan ti eksaminasyon inton Nobyembre gaputa daytoy metlaeng ti napasamak idi napan a tawen.
Impaganetgetna met a matuloy ti Police Executive Examination inton Agosto 14 para kadagiti Lieutenant colonel nga agtarigagay a maipromote kas colonel.
